Zmilnosć

Gronka ochranojskeje bratšojskeje wósady na lěto 2021

Pśichod jo droga, pó kótarejž hyšći nikula njejsmy šli. Wukóńc hyšći njeznajomy. Hyšći njewěmy, lěc derje dojźomy. Derje ga jo, gaž mamy něco k jěźi w nakśebjatniku, drogowniki na kśicnišćach a wjacor góspodu na pśenocowanje. Za wšo se pórucuju gronka ochranojskeje bratšojskeje wósady. Na jadnom dnju Bóže słowo nas zmócnijo a na dalšny kusk drogi wuskoboźijo. Na drugem dnju móžo nam pśi małych a wjelikich rozsudach k pomocy byś. A wjacor jo nam kazane pśebywaś a pśemyslowaś, pśiś ze sobudrogujucymi do rozgrona, snaź spiwaś a se módliś. Gronkowe teksty su stare, cesto derje znate. Zestajenje jo drje wótergi njewócakane. Kjarliže a bjatowanja wótwóriju młogi raz kradu nowe horiconty. Wšykne teksty nas sobu wzeju, nam wócy a wušy rozwěžu, aby my źeń ako Bóžy dar a nadawk zachopili a zakóńcyli. Nad wšyknymi dnjami stoj gronko lěta, kenž jo wubrała Ekumeniska źěłowa kupka za bibliske cytanje. Za pśiduce lěto 2021 jo gronko: „Buźćo zmilne, ako tež waš Wóśc zmilny jo.”^{Lk 6,36}. Bog jo zmilny, mimo wuměnjenja. Njejo jano casy zmilny, nic jano, gaž jogo pšosymy. Jo pśecej taki. To jadnorje k njomu słuša. Jezus nas napomina, se měś pó njom. Ale kak cesto se nam to raźijo? Mamy źeńk ak źeńk znowa nawuknuś. Což Biblija pomjenjujo zmilnosć, njejo lažko z jadnym słowom pópisaś. Jo ta šćodriwa wašnja, z kótarejuž cłowjek w orienśe pśijaśelow a cuzych k sebje pśepšosyjo. Tak Biblija pópisujo Boga. To znajomy drje teke wót slědnych smužkow znatego psalma 23. Taku zmilnosć smějomy dowěry połno wótcakaś. Wóna dajo kuždy źeń góźbu, wuknuś wót njeje. Cełe lěto gronka nam na to kažu. Pśichod jo ako droga, pó kótarejž hyšći nikula njejsmy šli. Bog jo wšak z nami ducy ze swójim słowom, ze swójim žognowanim a ze swójeju wjelikeju zmilnosću.

Pó pśedsłowje w brošurce Bóže słowo na kuždy źeń 2021. Budyšyn: LND 2020.

Bibliski citat pó: Biblija abo to zełe Sswėte Pißmo Starego a Nowego Teʃtamenta, do ßerʃkeje rėzy pcheʃtawjone, wot nowotki pilṅe pʃcheglėdane a pʃcheporėżane. Hala: Kanʃtein (1868).