5. oktobera 2023 jo wumrěł faraŕ Sven Oliver Lohmann. Ako cłonk Lutherskeje wósady jo był wjelgin aktiwny w cełem cerkwinem wokrejsu Chóśebuza ako cłonk synody a wokrejsneje cerkwineje rady. Jo był wjelgin angažěrowany pśi zasej wóžywjenje źěłabnosći Spěchowańskego towaristwa za serbsku rěc w cerkwi z. t. W lětach 2015 do 2018 jo statkował ako pókładnik w pśedsedaŕstwje. Derjeměśe serbskeje wósady jo jomu było wutšobina pótrjebnosć. Jo był wustuděrowany biolog, ale jo kśěł rad ako faraŕ statkowaś. Toś ako 40lětny jo zachopił studěrowaś teologiju. Ako wikar jo se wrośił do Chóśebuza, a wót 1. januara 2023 jo pśewzeł faraŕske městno na Lutherowej cerkwi. Jo mógał zdobywaś luźi ze swójeju bogatosću na idejach a angažěrowanosću. W maju toś togo lěta jo był ordiněrowany. W slědnych mjasecach śěžka chórosć jo jogo katował. Weto njejo pópušćił až do smjerśi, dalej wósadu pódpěrowaś.
17. oktobra jo se wótměła žałowaŕska namša w Lutherowej cerkwi. Biskup Christian Stäblein z Barlinja jo prjatkował. Pó namšy Sven Oliver Lohmann jo był zakopowany na chóśebuskem pódpołdnjowem kjarchobje. Daś serbska zemja jomu lažko jo.
Hartmut S. Leipner, Nowy Casnik 2023-11-02
Wobraz (© Siegfried Malk): Sven Oliver Lohmann (nalěwo) z Wernerom Měškankom na zgromaźinje Spěchowańskego towaristwa za serbsku rěc w cerkwi w lěśe 2015
Libotka 