Wót 1. do 3. septembra 2023 su se wótměli w dolnosakskem Wendlanźe swěźeńske dny Wendentage, kótarež jo zorganizěrowało tamne towaristwo „Wendischer Freundes- und Arbeitskreis e. V.”. Wjele Serbow z Łužyce jo se wobźěliło na zarědowanjach w kulturnem centrumje Allerlüd města Łuchow/Lüchow a w Muzeju kulojcow w Lubolinje/Lübeln. Mimo oficialnych zastupowarjow Domowiny jo dojěła źiwadłowa kupka „Bratrowstwo“ wórjejskeje župy do Wendlanda. Wóna jo pokazała kusk w serbskej rěcy „Skóńcnje něco z niwowom“, kenž jo se teke simultanje pśełožował do nimskeje rěcy. W pisanem programje w Muzeju kulojcow jo wustupiła kupka Serbska reja. Zgromadnje z folklorneju kupku De Öwerpetters su prezentěrowali prapremjeru drjewjańskich rejow. Spiwaŕ Bernd Pittkunings z Chóśebuza jo se starał wó program za źiśi. Mjazy informaciskimi a pśedawaŕskimi stojnišcami su byli teke serbske póbitowanja wót Spěchowańskego towaristwa za serbsku rěc w cerkwi z. t. a wót župy „Handrij Zejler“ z Wórjejc. Wšake pśednoski su wobogaśili program: Mjazy drugim jo rozpšawił Werner Sroka wó slěźenjach Arnošta Muki we Wendlanźe, dr. Hartmut Leipner wó serbskej Bibliji a dr. Arne Lucke wó mytologiji wampirow pla Słowjanow.
Njeźelu jo stojała wósebnosć na programje: Nimsko-dolnoserbska dupjeńska namša pód gołym njebjom w Lubolinje. Wósadny pastyŕ Michael Ketzenberg jo pśewzeł nimsku liturgiju a prjatkowanje a lektor dr. Hartmut Leipner serbski part. Wušej 160 namšarjow jo pśichwatało, aby sobu dožywiło wjerašk namše, kenž jo wobstojał w dupjenju 6 źiśi direktnje w młyńskej rěcce wót Lubolina. Z pódpěru pśibytnych Serbow su mócnje zazněli kjarliže teke w serbskej rěcy ako „Na twójo mě som ja dupjony“ abo „Pójź wutšoba, buź wjasoła“. Z pomocu spiwaŕskego łopjena jo se pilnowała městna wósada, serbske teksty sobu spiwaś. Na zachopjeńku namše jo pśepódał dr. Hartmut Leipner wósaźe dar spěchowańskego towaristwa. To jo był zeleny parament we tśi rěcach: w drjewjańšćinje „Sjǫtü vardoj tüji jaimą“, w dolnonimšćinje „Laat heilig warn dien Noom” a w nimšćinje „Geheiligt werde dein Name“. Z Wóścenasom a wužognowanim w nimskej a serbskej rěcy jo se skóńcyła namša. Wót Spěchowańskego towaristwa za serbsku rěc w cerkwi pśigótowane tšojorěcne łopjena z Wóścenasom w drjewjańskej, dolnonimskej a dolnoserbskej rěcy jo mógał kuždy namšaŕ a kužda namšaŕka domoj sobu wześ.
Pastyŕ Ketzenberg jo měł dwójorěcnu namšu za wjelgin inspirěrujucu. Pśedsedaŕ towaristwa Wendenfreunde Ernst Stelte jo śěgnuł wuspěšnu bilancu: „Mimo Serbow z Łužyce njeby mógali Wendentage tak wuspěšnje pśewjasć.“
Hartmut S. Leipner: Artikel w Pomhaj Bóh 2023-10.
Libotka 