Pokaž mě, Kněžo, swóju drogu. (Ps 86,11)

Kóńc junija comy se wudaś na drogu do Zgórjelca na Łužyski cerkwiny źeń. Ten wjeliki cerkwiny swěźeń ma nimske dwójozmyslne moto VONWEGEN, kenž se tak njedajo do serbskeje rěcy pśenjasć. Wót drogow jo to grono, ale we pitśku spěratej kšajźnej mysli. To mě spomina na profeta Jonasa w Starem testamenśe, kenž se na take a wšake drogi a wokołodrogi dajo. Jonas, ten njelepy profet, njama lušt, nadawk Kněza dopołniś. Wón źe ma pśinjasć špatnu powěsć městoju Ninive. Źo ga! Jonas se dajo na wuběgi. Zazdaśim wěri, až móžo Bogoju wuběgnuś. Stanjo se njegluka, ako jo snaź doprědka wiźeś, gaž se něchten na kśiwe drogi dajo. Na pśewóze do Tarsisa pśiźo łoź do štorma, a Jonas se skóro zalewa. „Wóno se sta to Knězowe słowo | וַיְהִי דְּבַר־יְהֹוָה”.Jon 1,1 Bog dogónijo njepósłušnego profeta – pśez wjeliku rybu. Ta ryba jogo pśed zalaśim wumóžyjo. Tśi dny pózdźej jo zasej na zemju wuplunjony. W tej situaciji Jonas ma cas, wó swójom žywjenju pśemysliś. Dostanjo drugu šansu a póra se do Niniveja. Prjatkujo tam wobydlarjam, až Bog co nad nimi suźiś, dla togo, až su wjele złego cynili. Kak su te luźe na to reagěrowali? No jo, wóni su se napšawdu změnili a chopili hynakše žywjenje. Bog se wjaseli, gaž luźe póznawaju swóje winy a pšose wó zmilnosć a wódawanje. A co cyni Jonas? Wón jo rozgórjony, až pódermo jo wusud do Niniveja pśinjasł. Njamóžo rozměś, až Bog nještrofujo. Toś Jonas dostanjo dalšne pówucenje. Narosćo źiwnučki bomcyk, kenž Jonasoju chłodk dawa. Ale ten bom ginjo, a Jonas se wjelgin gniwa. Na to Bog se pšaša profeta: „Tebje jo luto teje banje, na kótarejž ty njejsy źěłał … A mě njedejało luto byś Niniveja”?Jon 4,10 Wótergi se groni, až Bog Starego testamenta zmilny njejo. Knigły profeta Jonasa nam wulicuju něco drugego. Pó kakej droze źomy, zmilny Bog źo z nami, a Knězowe słowo se stanjo.

Bibliske citaty pó: Biblija: Nowośišć na zakłaźe serbskeje Biblije z lěta 1868. Chóśebuz: Spěchowańske towaristwo za serbsku rěc w cerkwi 2020.

Wobraz: Logo Łužyskego cerkwinego dnja 2022 w Zgórjelcu

Bóže słowo w Nowem casniku, 2022-06-08.

Zanechat odpověď

Vyplňte detaily níže nebo klikněte na ikonu pro přihlášení:

Logo WordPress.com

Komentujete pomocí vašeho WordPress.com účtu. Odhlásit /  Změnit )

Twitter picture

Komentujete pomocí vašeho Twitter účtu. Odhlásit /  Změnit )

Facebook photo

Komentujete pomocí vašeho Facebook účtu. Odhlásit /  Změnit )

Připojování k %s