Kněžo, słyš mój głos

Lazujomy w lisće Pawoła na Hefezarjow we 3. stawje:

14Pókłanjam mójej kóleni pśed Wóścom našogo kněza Jezom Kristusa, 15kenž ten pšawy Wóśc jo nad wšyknymi, kótarymž źiśi gronje na njebju a na zemi, 16aby wam dał móc za tym bogatstwom swójeje kšasnosći, aby se mócowali pśez jogo Ducha na nutśikanem cłowjeku, 17aby Kristus bydlił pśez tu wěru we wašych wutšobach, aby wy we lubosći zakórjenjone a załožone byli. 18Tak by mógali ze wšyknymi swětymi hopśimjeś, kótaraž jo ta šyŕ a ta dłoń a ta dłym a ta husokosć; 19teke huznaś Kristusa lubosć, kótaraž pśestupujo wšykno wěźenje, aby byli napołnjone ze wšykneju Bóžeju połnosću.[Hefezarjow 3, 14–19]

Stwórtk jo był stupny źeń. Tuchylu se zda jano ako swěźeń za muskich, ale togo dnja naš Kněz Jezus Kristus do njebja stupi. „Wón jo stupił do njebja a sejźi k pšawicy Boga, wšogomócnego Wóśca.“ – tak bjatujomy. Jezus jo pšec. Ale kak to wuglěda how – na swěśe? Co jo z nami? Smy sami? Tej šestej njeźeli pó jatšach se groni exaudi. To jo łatyński zachopjeńk jadneje sady z psalma 27: „Kněžo, słyš mój głos, gaž ja wołam; buź mě gnadny a husłyš mě.“ [Psalmy 27, 7]

Něnto jo zasej cas cakanja pśišeł – ako ten cas pśichoda pśed gódami abo śichy cas do jatš cakamy něnto na swětki. – Su njewěste casy, kenž su pśišli. Kak źo dalej w Europje? Kak jo pśichod serbstwa? Co dejmy cyniś? Wójowaś za šćit wobswěta abo za źěłowe městna? Jo lěpjej cakaś za gardinu, až se něco pśeměnijo? Abo mamy se zarědowaś do małeje kupki jatšownych pśechójźowarjow (abo demonstrantow) pśeśiwo wótbagrowanjeju dalšnych jsow w slěpjańskich stronach? Wótegrona njejsu lažke. „Njecakaj na lěpše casy“ zbasni pěsnjaŕ Wolf Biermann w lěśe 1973. Teke źinsa to hyšći płaśi: Chtož njejo žednje něco wopytał, ten jo južo zejgrał. Njecakaj na ten wjeliki źiw, howacej zaspiš wjele małych źiwow.

Kněžo, słyš mój głos – se módlimy, ale wusłyšyjo Bog mě napšawdu? Póznajo mójo žebrjenje a póžedanje, gaž ja kradu njelepy powědam a sam njejsom wěsty, což cu? Rozmějo wón mójo jěkotanje w nimskej abo serbskej rěcy? Njeźela exaudi jo źeń pytanja Boga. Wukniki Jezusa zasłyšachu wót lubjenja swětego Ducha, ale hyšći njejsu jogo nazgónili. Napněśe, w kótaremž su žywe, skóro k wutraśeju njejo. To zachadne nic wěcej njewóznamjenijo, to pśichodne jo słabe. Chromjeca pśibytnosć jo pśemócna a wěžo. Pawoł we swójom lisće na to dopomina: Naźeja do pśichoda njepśiźo wót samego. Musymy pokorne byś, aby se mócowali w nutśikach pśez swětego Ducha, aby Kristus bydlił pśez tu wěru w našych wutšobach. Swójogo mócnego zastupnika a troštowarja wšak musymy spóznaś.

Jadno tšojeńko źo tak:

Póbóžny muž wusłyšyjo w radiju wót wusokeje wódy. To mě njebóli, dokulaž Bog mě šćita, wón se mysli. Ako ta wóda pśiźo, wumóžyjo se na kšywo. Cołń z luźimi plěwa mimo, a wóni kśě jogo wumóc. Muž pak pomoc wótpokažo a wótegroni: „Nje, mě se nic njestanjo, Bog mě wumóžyjo.“ Wóda stupa dalej. Ako wóda jomu až pó šyju stoj, helikopter wjerta nad kšywom. Wobsadka helikoptera pušćijo jabrik dołoj, aby jogo wumóžyła. Zasej wótegroni, až to njejo notne. Wón wobstawnje bjatujo a Bog ten Kněz buźo wódu slědk śěgnuś. Muž se slědkoju zalejo a we wěrje zatśěsowany stoj pśed wrotami do njebja. Groni Pětšoju: „Wěrił som, až Bog jo mě wusłyšał, ale wón jo mě wóstajił.“ Pětš se pak smjejucy wótegroni: „Njewěm, dla cog se wobskjaržyjoš. Smy tebje warnowali w radiju a smy pósłali cołn a helikopter.“

Jo, wótergi njerozmějomy abo njocomy rozměś, což Bog nam co wujasniś. Wótergi cakamy jano na ten wjelicny źiw. Pśi tom nam źo ako tomu póbóžnemu mužoju: Wóstanjomy jano pasiwnje. Wobcakaś a sćerpny byś, to jo drje wiźone ako dobry pócynk. Toś ale šanse za našo žywjenje njezawupytnjomy a njezapśimjejomy. Cesto njamóžomy pokornje słyšaś na Boga głos w našych wutšobach. Pawoł se pókłonijo pśed Wóścom, dokulaž co se něco wupšosyś: móc, wěru, lubosć, wěźenje. Kólenkowanje zwuraznja wěste nastajenje k Bogoju: Njamóžomy nic pominaś, jano pokornje pšosyś.

Dajśo nam póznaś swětego Ducha, kenž jo mjazy nami žywy, a napołniś naše wutšoby, aby se naše póžedanje na naźeju dopołniło.

A Bóžy měr, kótaryž jo wušej wšyknogo rozyma, hobzwarnuj waše wutšoby a mysli we Kristusu Jezusu.[Filiparjow 4, 7] Amen.

Bóže słowo njeźele exaudi w serbskem rozgłosu RBB, 2016-05-08.
Bibliske citaty pó: Biblija abo to zełe Sswėte Pißmo Starego a Nowego Teſtamenta, do ßerſkeje rėzy pſcheſtawjone, wot nowotki pilṅe pſcheglėdane a pſcheporėżane. Hala: Kanſtein (1868).
Bildka: Sabrina Reiner, Licenca CC BY-SA.

Zanechat odpověď

Vyplňte detaily níže nebo klikněte na ikonu pro přihlášení:

Logo WordPress.com

Komentujete pomocí vašeho WordPress.com účtu. Odhlásit /  Změnit )

Google photo

Komentujete pomocí vašeho Google účtu. Odhlásit /  Změnit )

Twitter picture

Komentujete pomocí vašeho Twitter účtu. Odhlásit /  Změnit )

Facebook photo

Komentujete pomocí vašeho Facebook účtu. Odhlásit /  Změnit )

Připojování k %s